JamiiForums
JF Official Account
- Nov 9, 2006
- 6,202
- 5,029
TAARIFA KWA VYOMBO VYA HABARI
UZINDUZI WA AWAMU YA 3 YA SHINDANO LA “STORIES OF CHANGE”
UZINDUZI WA AWAMU YA 3 YA SHINDANO LA “STORIES OF CHANGE”
Ndugu Wanahabari,
JamiiForums (JF) ni asasi ya Kiraia iliyosajiliwa kufanya uchechemuzi wa Haki za Kidigitali, Demokrasia, Uwajibikaji na Utawala Bora. Vilevile, JF inaratibu jukwaa la JamiiForums.com ambalo ni maarufu duniani kwa maudhui ya Kiswahili na tovuti namba moja nchini yenye rekodi ya kufikia watu zaidi ya Milioni 3 kila siku.
Kwa muda mrefu, JamiiForums.com imechangia kuleta mabadiliko katika uchakataji taarifa nchini. Wananchi Jukwaani humo hushiriki kuripoti Matukio kwa haraka na kuanzisha mijadala yenye staha.
Katika mpango mkakati wake wa miaka 5 (2020-2024), JF ilidhamiria kuendesha shindano lenye lengo la kuwawezesha wananchi kushiriki katika kuongeza ubora wa maudhui ya Kiswahili mtandaoni yenye kuchochea mabadiliko kwa kizazi cha sasa na cha baadae.
Awamu ya kwanza ya shindano hili ilifanyika kuanzia Julai hadi Oktoba 2021 ambapo jumla ya wananchi 1,509 walishiriki na kuandika jumla ya machapisho 1,536 huku 936 yakipitishwa kuingia kwenye shindano. Washindi watano wa kwanza walikabidhiwa zawadi mbalimbali katika hafla iliyofanyika Jijini Dar es Salaam mwezi Oktoba 2021.
Awamu ya pili ya shindano hili ilifanyika kuanzia Julai mpaka Septemba 2022 ambapo wananchi 1,820 walishiriki na kuandika jumla ya machapisho 2,073 huku 1,462 yakipitishwa kuingia kwenye shindano. Washindi bora kumi walikabidhiwa zawadi mbalimbali katika hafla iliyofanyika Jijini Dar es Salaam mwezi Novemba 2022.
Miongoni mwa maudhui yaliyowasilishwa yamechangia maboresho katika mifumo ya utoaji huduma Serikalini huku baadhi ya taasisi zikipokea mapendekezo na kuahidi kuyafanyia kazi.
Awamu ya Tatu (2023)
Baada ya kufanikiwa kufanya shindano la Stories of Change mwaka 2021 na 2022, JF imedhamiria kufanya shindano hili mwaka 2023, litakalofanyika kwa siku 90 kuanzia tarehe 01 mwezi Mei. Awamu hii, wananchi wataandika maudhui mbalimbali yanayolenga kuchochea mabadiliko chanya na kupelekea kuwepo kwa Uwajibikaji au Utawala Bora.
Katika shindano la mwaka huu, JF itashirikiana na wadau mbalimbali wakiwemo Chuo Kikuu cha Mtakatifu Agustino Mwanza (SAUT) na Muungano wa Klabu za Waandishi wa Habari Tanzania (UTPC) kwa kutambua mchango wao katika upashanaji Habari ikiwa ni Pamoja na kushiriki katika kuwandaa wananchi/vijana waliosomea taaluma ya habari, pia katika kufanya tafiti mbalimbali zinazoleta mabadiliko nchini.
Vigezo na masharti ya kushiriki katika shindano hili:
- Mshiriki anatakiwa kutayarisha andiko linalochochea mabadiliko na kwenye nyanja zote za Utawala Bora (ikiwemo Uwajibikaji).
- Andiko liwe kwa lugha ya Kiswahili lenye maneno kati ya 700 na 1,000.
- Matumizi ya picha, vielelezo na video yanaruhusiwa ili kuongezea uzito wa wasilisho. Ikiwa picha/video zilizotumika si za mshiriki, atatakiwa kutaja chanzo.
- Machapisho yanatakiwa kuwa halisi yasizowahi kuchapishwa sehemu nyingine yoyote. Ubwakuzi (Plagiarism) hautaruhusiwa.
- Maandiko yawasilishwe ndani ya siku 90 kuanzia Mei 01, 2023 kwenye jukwaa la “Stories of Change 2023".
- Ili kushiriki, LAZIMA mtu awe mwanachama aliyejisajili JamiiForums.com ili kuchapisha maudhui yake kwenye jukwaa la shindano la Stories of Change. Ikiwa sio mwanachama, anapaswa kujiandikisha kwa kufuata kiungo hiki Register
- Washiriki wanaweza kutumia Majina yao ya Kuigiza (pseudonyms) katika shindano hili, wakijua kuwa mshindi anapaswa kuwa tayari kutoa utambulisho wake halisi kwa madhumuni ya kukabidhiwa zawadi pale atakaposhinda.
Jopo la majaji linaloundwa na wataalamu 5 wenye mchango mkubwa katika masuala ya uwajibikaji na utawala bora nchini, litaamua washindi kulingana na vigezo vilivyowekwa. Kura za majaji zitabeba 60% ya ushindi huku kura za wananchi jukwaani zikibeba 40% ya ushindi.
Washindi watapewa taarifa kuhusu ushindi na akaunti rasmi ya JamiiForums kupitia ujumbe wa faragha katika akaunti zao walizotumia kushiriki na kisha kutangazwa kwenye jukwaa la JamiiForums "Stories of Change" na kurasa za JF katika mitandao ya kijamii (Twitter, Facebook, Instagram na Telegram) na si vinginevyo.
JF inawaalika wananchi wote wenye miaka 18 na kuendelea kushiriki katika Shindano hili, ili kutimiza haki yao ya msingi ya kujieleza na kuhamasisha Serikali kutekeleza wajibu wake wa utoaji huduma bora kwa wananchi.
Soma hapa vigezo na masharti SoC03 - Vigezo na masharti ya kushiriki katika Stories of Change 2023
